أغنية الهلفوت

واحد هلفوت 
عدى الشارع قدامي وقعد ع البحر،
بيكلمه في سكوت وكأن بينهم سر، 
وأنا مش فضولي 
بس أنا مستني لسه مجاش دوري والدنيا حر،
ركزت معاه لقيته بيحكي له عن قصر، 
هو بيتمناه عشان حب مكبوت جواه،
عدى الوقت مر واتحول كلامه لمر، 
صرخ بعلو الصوت أنا ليه مش حر،
وتملي كده بطولي،
وحيد في الوجود والبحر ولا عنده ردود،
وافتكر أخينا انه مجرد هلفوت

مجنون يا بلدينا ولا حكايتك إيه،
بتحكي للبحر نفسك في قصر يتبني ع البر،
ومستني رد ده بجد طب لو رد،
إبقى قولي قالك إيه،

واحد هلفوت 
عدى الشارع قدامي وقعد لوحده،
هو نفس الهلفوت والحكاية عنده، 
خدني الفضول المرادي،
وبيعدي دوري وكله ماشي عادي يلا اللي بعده، 
وتركيزي عليه اخينا ده مين بيسانده، 
طب ليه هو مش مبسوط وليه،
مش على بعضه وكأن حد مده،
لقتني فجأة بفوت ودخلت في أرضه، 
كانت المرايات قصادي،
قدامها مخضوض شايفني فيها موجود، 
وضحكت أتاريني أنا كنت الهلفوت

مجنون يا اخينا زيك أكيد،
مش لوحدينا كتير وادينا بنكلم نفسينا،
هترد على مين ولا مين كلنا مجانين،
والبحر هو صاحبنا الوحيد،